Imaxina un Bulevar ye una plataforma que surde dende'l compromisu y l'ilusión de los vecinos y vecines de Ventanielles y Guillén Lafuerza. Nos pasaos trés años trabayemos siempres mirando escontra'l futuru, ilusionándonos con daqué meyor pa toles persones qu'esfrutamos d'esta ciudá.
Cola vista puesta no que fuera esta zona fuimos dando pasos pa recuperala tal y como yera primero que l'asfaltu quebrara los barrios de la entrada d'Uviéu, cola idea de restablecer el contactu ente los barrios agora separaos. Nel nuesu suañu y tamién nel del Conceyu d'Uviéu de dir refaciendo la ciudá, muévenos tamién l'interés por protexer como se merez, la ilesia de Santuyano, una de les xoyes del Prerrománicu Asturianu y Patrimoniu de la Humanidá.
Fuimos dando pasos y camudando delles coses p'ameyorar la nuestra salú y el bienestar de toos. Consíguese asina amenorgar la velocidá p'amenorgar la contaminación y camudar el pavimentu por que'l tráficu sía menos ruidosu. Adulces, anque con torgues nel camín, siguimos suañando con tresformalo entá más yá que nun consiguimos integrar los barrios polos qu'escurre esta antigua autopista, comunicalos de forma natural.
Con esa idea, de romper col pasáu d'esti llugar agora ensin nome, la "antigua A-66" y cola collaboración del Conceyu d'Uviéu, preséntase esta iniciativa. Queremos convidate a caminar xuntos y xuntes hacia lo nuevo.
Ye fácil que, en dalgún momentu, tuvieres que dar nome a daqué. Una mascota, un bebé, una casa... ¿recuerdes qué ilusión te fixo llamalo como tu queríes?
Nun queremos identificar esta parte de la ciudá como daqué ermu, ensin usu, muertu y por ello queremos que tu-y deas identidá a lo que va ser. Un llugar pa pasiar, xugar, esfrutar, correr, andar en bici, parolar, axuntase... como yá lo foi les veces que lu ocupamos.
Dende esi suañu de qu'esti tamién puede ser un llugar de convivencia pa toos y toes, convidámoste a dexar volar la to imaxinación y proponer un nome pa esta nueva vía.
Por eso... piensa cómo imaxines esti espaciu, ¡propon un nome!. Dende esi espíritu de convivencia que nos caracteriza a los uvieinos y les uvieines, convidámoste a pensar nomes que
- destaquen valores cívicos universalmente reconocios
- reconozan rasgos identitarios que confieran una personalidá propia al llugar, o bien
- resalten el trabayu, la participación y el protagonismu de la colectividá qu'inspiren el proyectu "Imaxina un Bulevar".