Los tres grupos políticos que conformen l'Equipu de Gobiernu algamaron ayeri, tres una maratoniana xunta de más de nueve hores, un alcuerdu políticu al rodiu los presupuestos municipales pa 2016, con un montante global que xube a 211 millones d'euros.

 

Los voceros de Somos, PSOE y IX ufiertaron esta mañana una rueda de prensa pa valorar esti alcuerdu. La primera n'intervenir foi la vocera de Somos y conceyala d'Información y Participación Ciudadana, Ana Taboada, quién destacó qu'el d'Uviéu nun ye un Gobiernu monocorde "nel que magar que cada unu de los Grupos políticos toca una música distinta, la sintonía del cambiu ye la mesma".

 

Taboada indicó nesti sentíu que na negociación de les cuentes pa esti exerciciu, l'oxetivu de toos yera que supongan "un cambiu nel modelu de ciudá" y valoró asina la responsabilidá nel  diálogu" y la capacidá política" demostrada por tolos Grupos.

 

Al respective de los presupuestos señaló que "ruempen con 24 años de mal gobiernu del PP" y qu'apuesten por un modelu de ciudá dirixíu a les persones, a los barrios, a la zona rural; qu'atiende al empléu y fomenta l'empléu públicu; el cogobierno y contempla un plan de rescate ciudadanu".

 

Asina, esplicó, les cuentes pivoten sobre cinco grandes exes: la defensa de lo público, un plan de rescate ciudadanu, la llucha contra'l desempléu, la participación ciudadana y un nuevo modelu de ciudá más sostenible. La conceyala ufiertó delles pincelaes sobre estes cuentes, que van ser presentaes en detalle pol alcalde y el conceyal d'Economía nos prósimos díes.

 

No que cinca a la recuperación de lo público", Taboada anunció la xestión directa del mercáu de La Corredoria y el Viveru de Ciencies de Salú y una mayor ufierta pública d'empléu. Nesti sentíu, anunció que se van sacar a llicitación pública 48 empleos, amás de los 35 puestos de trabayu que se van crear una vegada se remunicipalice'l serviciu de xestión de tributos.

 

Amás, van crease 300 nuevos puestos de trabayu al traviés de los Planes d'empléu y van desenvolvese midíes de fomentu del cooperativismu, la economía solidario y  social. Coles mesmes, van destinase 200.000 euros a beques pa combatir la fuga de celebros'.

 

No que se refier al plan de rescate ciudadanu, la conceyala d'Información aseguró que nestos presupuestos "casi doblamos la convocatoria d'ayudes d'emerxencia social que van cubrir los gastos de lluz, gas, agua, comida y vivienda" amás de destinar 50.000 euros a subvencionar l'arriendu social y d'aumentar nun 20% la cuantía de beques pa llibros de testu. Amás, casi se dobla el dineru destináu a l'atención sociosanitaria, aumenten en más de 730.000 euros les beques pa los comedores escolares y dedíquense 300.00 euros a un bonu social pa tresporte púbicu pa colectivos desfavorecios. D'últimes adelantó que se van poner en marcha planes especiales pal Monte Naranco y la zona rural.

 

Pela so parte, el conceyal de Seguridá Ciudadana, Ricardo Fernández, qu'actuó como voceru del PSOE, destacó que l'alcuerdu alcanzáu ayeri "ye una bona noticia pa la ciudá" y añedió que ye frutu del diálogu, la xenerosidá, a la intelixencia y la bona voluntá" de tolos Grupos.

 

Fernández sorrayó qu'estes cuentes ponen l'acentu no social con una medría nes partíes destinaes a Cultura, Educación y Atención a les Persones. "Unes cuentes que van dexar reconstruyir la ciudá y poner fin a un ciclu de 24 años monocolor, con unes cuentes ornamentales y de cara a la galería", sentenció'l conceyal.

 

A lo último, la conceyala de IU Cristina Pontón, manifestó qu'estos presupuestos "van dexar qu'Uviéu yá non vaya a dos velocidad ente'l centru y la zona rural y que naide se quede atrás".